Gwyddom y gall eich iechyd newid dros amser a gall effeithio ar sut y gallwch reoli eich cartref yn ddiogel ac yn annibynnol. Weithiau, gall addasu eich cartref wella eich iechyd a’ch lles eich hun, ac iechyd a lles eich teulu a’ch gofalwyr.

I rai pobl, gall addasiadau bach fel rheiliau cydio, rheiliau grisiau, rampiau bach, coffrau allweddi neu dapiau liferi wneud gwahaniaeth mawr, ac mae Beacon yma i helpu.

Os oes angen addasiad mwy arnoch fel cawod gerdded i mewn, lifft grisiau neu ramp mawr, yn y rhan fwyaf o achosion gall Beacon wneud cais am gyllid Grant Addasiadau Ffisegol (PAG) gan Lywodraeth Cymru i'w gwneud hi'n haws i chi ymdopi gartref. Nodwch mai dim ond i eiddo anghenion cyffredinol y mae hyn yn berthnasol.

Nid oes terfyn oedran ar gyfer gwneud cais am addasiadau ond mae'n rhaid bod gennych chi, neu rywun sy'n byw gyda chi, angen cydnabyddedig am yr addasiad.

Pan fyddwch chi'n cysylltu â ni, byddwn ni'n gofyn am eich iechyd a sut mae'n effeithio arnoch chi o ddydd i ddydd. Byddwn ni hefyd yn gofyn i chi am eich cartref i weld a ellir ei addasu. Os gallwn ni addasu eich cartref i'w wneud yn fwy addas ar gyfer eich anghenion hirdymor, byddwch chi'n cael eich asesu gan Aseswr Dibynadwy o Beacon neu Therapydd Galwedigaethol (OT). Yn dibynnu ar y math o addasiad sydd ei angen arnoch chi, yna bydd Swyddog Grantiau Technegol Beacon yn ymweld â chi i wirio y gall y gwaith fynd yn ei flaen.

Yn anffodus, os ydych chi'n aros am addasiad mwy, oherwydd gostyngiad mewn cyllid PAG yn ystod y blynyddoedd diwethaf, mae trigolion yn aros yn hirach i'w cartrefi gael eu haddasu. Ar hyn o bryd, mae trigolion yn aros dros flwyddyn o'r pwynt y maent yn cysylltu â ni gyntaf, yn y rhan fwyaf o achosion.

Er mwyn gwneud yn siŵr y gallwn weithredu’n gyflym ar achosion brys, rydym wedi cyflwyno system brysbennu. Yn unol â chanllawiau Llywodraeth Cymru, byddwn yn asesu pa mor frys yw eich anghenion. Rhai o’r pethau y byddwn yn eu gofyn yw:

• Ydych chi yn yr ysbyty, ond ni allwch gael eich rhyddhau oherwydd nad yw eich cartref yn ddiogel i chi ddychwelyd iddo?
• Ydych chi'n derbyn gofal lliniarol neu ddiwedd oes?
• Oes gennych chi gyflwr meddygol sy'n cyfyngu ar fywyd?

Nid addasu’r cartref rydych chi’n byw ynddo nawr fydd yr opsiwn gorau i chi bob amser ac efallai y byddwch am feddwl am drosglwyddo i eiddo sydd eisoes wedi’i addasu. Er na fyddwn yn gwybod faint o amser y bydd yn ei gymryd i'r cartref iawn ddod ar gael, rhowch wybod i ni os ydych chi'n meddwl bod hwn yn ddewis gwell i chi.

Nid yw cwympo yn rhan arferol o heneiddio felly, os ydych chi'n poeni am gwympo gartref, mae'n bwysig siarad â'ch meddyg teulu. Gallwch hefyd gael cyngor yma:

Cwympiadau - Atal

Cwympiadau - Atal (i'r henoed)